تم تجميد حسابي الراجحي نهائي ماهو الحل ؟

Question

الراجحي اليوم جمدوا حسابي نهائيا وعملوا لي اخلا طرف بسبب كثره الحوالات على الحساب رغم اني عمل حر وشغلي كله موثق ومع ذلك تم اغلاق الحساب

Answer 1

افتح حساب في بنك آخر
سابقا كانت الناس لازم نفس الحساب عشان الرسوم وعشان سرعة استلام المبلغ، الان ما تفرق حوالة سريع ورسوم بسيطه فما يهم وش الحساب مو شرط تلتزم الراجحي، ورغم ذلك لا تخليهم اشكهم وايضا اذا عندك اثباتات انك حاولت تفتح حساب تجاري وتم تعطيلك

Answer 2

أي احد قاعد يشتغل في حسابه الاساسي اقولك من الحين طلع لك حساب تجاري
ولا ودع حسابك .. المشكلة اني لي شهر قاعد اراجع الفرع عشان يفكون لي حساب تجاري بوثيقة العمل الحر وكل يوم كلام وعذر يبوني اسكن عندهم في الفرع عشان يفكون لي الحساب يعني لاهم الي فكو لي حساب تجاري وخلوني اشتغل ولا هم تركوا حسابي الشخصي في حاله بالله هذا بنك لكن برفع شكوى في ساما ونشوف وش نهايتها مع هذا البنك..

Comments

قدم شكوى في البنك المركزي .....واذا لم يحلها البنك المركزي قدم شكوى في هيئة الفصل في المنازعات المصرفية ....
 لا تستسلم لهم

تم التعليق عليه منذ 5 شهور

بواسطة يزن

Answer 3

لا تفتح حساب واحد افتح اكثر من حساب بنفس البنك وبنفس الوثيقة
نفس فكرة اكثر من خط جوال من نفس الشركة الاتصال
بحيث تتوزع عمليات التحويل على عدة ارقام حسابات بالراجحي وليس على حساب واحد

ايضاً حاول توفر خيار اخر غير الراجحي لـ عملائك مثلاً STCPAY مجموعة اخرى من البنوك ..

Answer 4

الراجحي معروف متشددين شوي بالاجراءات بسبب كثرة الاحتيال و خايفين

انتم تذكرون السالفة سرقة هاليومين .. ومعذورين

انصحك تفتح حساب بنك اخر لان الراجحي صارو متشددين

Answer 5

نفس وضعك تقريبا انا استقبل حوالات متعدده من خدمات الكترونية اقدمها وتم تجميد الحساب
راجعتهم وطحت على موظف محترم علمته بالموضوع وقال بنشيل التجميد
لكن لازم توقع على ورقة تعهد بعدم استعمال حسابك الشخصي كحساب تجاري
ولو حاب تستمر باستقبال حوالات تجارية افتح حساب تجاري

الزبدة اني قللت من استقبال الحوالات في الراجحي ورفعت عدد العمليات من عنده
وان شاء الله الامور طيبه.. العجيب اني استقبل اكثر في بنك آخر ولم اواجه مشاكل

Answer 6

افتح حساب تجاري او غير البنك

الحسابات الشخصية ترى نكبه اي مشكله تصير يسحبونك برجلينك
يطلع حساب شخص مطلوب او عليه بلاوي او او او تدخل في سين وجيم
مثل الي لا وقفت عند الصراف جاك واحد يقولك خذ هالفلوس وحولها لي لاتعرفه ولا تدري وش دنية اهله
تطلع فلوس مزوره او يطلع حساب مطلوب او او او

خذو الموضوع بجديه

كذلك الحسابات الشخصية ممكن بكره بعد مايشتري الشيء منك يطالبك بالفلوس مره 2
وياخذها طرق من المحكمه وبيقول انها سلفه لك

انتبهوا يا اخوان فيه ناس ماتخاف الله السرقة في دمها

Answer 7

انا مافهمت ليه تطلعون بالراجحي الي شايف نفسه ويحسب انه دائره حكوميه ؟ حتى فتح حساب جاري لازم موعد ومع اني مسوي اون لاين !
رح الانماء ولا البنوك الكويسه ذي وتضبط امورك
الراجحي لو تجيك حواله 20 الف قفلو حسابك !
الانماء تجيني اداعات احيان اولها قبل امس 28 الف ولا دقوا ولا قالو شي اصلا

Answer 8

الراجحي
و كثير جهات تجارية غيره
ما تحب تتعامل مع الجهات الحكومية كثير
عشان كذا دائماً تحصلهم يزيدون تضييق من عندهم على العميل و طز في العميل اذا كنا بنفتك من التعامل مع الجهات الحكومية

تحصل مثلاً البنك المركزي ارسل تعميم انه اذا شخص حصل حركة غريبة على حسابة
مثلاً استقبل مبالغ و اعاد تحويلها
مثلاً استقبل مبلغ كبير بشكل مفاجئ
مثلاً استقبل مجموعة مبالغ صغيرة لكن مجموعها كبير
المطلوب من البنوك التواصل مع العميل و التأكد من ان كل شي تمام و نظامي فقط لا اكثر ولا اقل

يجيك الراجحي يقفل حسابك و يحوس حياتك عشان اذا رحت لهم تطيح في موظف يحمل نفس عقليةالمنشأة التعيسه هذي و يقولك انت قبيلك البنك المركزي رح تفاهم معهم

Answer 9

كم عدد عملياتك تقريبا
وكم متوسط التحويلات

انا خايف يقفلون حسابي

عندي تحويلات بسيطه من 30 ريال الى 200
يعني يمكن بالشهر  20 عمليه فقط
وبعضهم يحطون مشتريات  
مع العلم اقولهم حطو شخصي وبعضهم يخافون انصب عليهم ويحطون مشتريات

Answer 10

اخوي عنده اعمال حره والراجحي قفلو حسابه

فتح بالجزيره واموره تمام

Answer 11

اللي أعرفه :

المفروض تحدد شهرياً كم عدد الحوالات وكم متوسط المبالغ ا
اي رقم يخرج عن اطار الرقم اللي ذكر عند فتح الحساب راح يجمدونه

Answer 12

اللي الرجحي جمد حسابه وعطاه اخلاء طرف بسبب التحويلات

اخلاء طرف يتم بتوقيع من الطرفين او من طرف واحد وهل هو العميل او ادارة البنك او مايحتاج توقيع ؟؟

اخلاء طرف هل معناته يتم اغلاق حسابك البنكي وعدم مطالبات البنك في اي امور ماليه تتعلق بالحساب ؟ مو المفروض مايتم اخلاء طرف الا بعد مايتم التثبيت والتأكد بشكل كامل من دخول تحويلات بشكل غير قانوني وعدم وجود اي توثيقات شرعيه بخصوص التحويلات ؟لكن في وضعك انت موثق وتحويلاتك سليمه فليش يعطونك اخلاء طرف؟

انا بحثت بهذي الجزئية لكن حصلت رؤؤس اقلام مافهمت بالشكل الصحيح انا مهتم في موضوع تجميد الحساب لان بعد فتره بيدخل حسابي مبلغ وقدره لكن انا اعمل كفرد والمبالغ اللي راح تدخل هي استثمارات باسواق المال ومالها علاقه بالأمور التجاريه وعندي مايثبت
لكن اخلاء الطرف لازم اشوف وضعه

Answer 13

تحديث : بعد ماقفلوا حسابي الشخصي وانفتح حسابي التجاري بعد مارفعت عليهم شكوى في ساما وفتحو حسابي قبل اسبوعين تقريبا .. الان بعد استخدام الحساب التجاري لمدة اسبوعين تم تجيمد الحساب التجاري كذلك !!! الي قبل لا يفكونه لك ياخذون كل الوثائق والاثباتات حقت شغلك وبعدها يفتح تم تجميدة
يعني قسم بالله قله حيا ولا في احد يوقفهم عند حدهم

معانا كم فلس نشغل فيها ضايقونا عليها

Comments

وش اللي حادك تبقى معاهم ويتعطل رزقك ؟ شوفك لك بنك أخر

تم التعليق عليه منذ 5 شهور

بواسطة جابر

---

البنك اللي ما يبي يخدمك هو الخسران.
روح شوف غيره لا تدور على حل انك ترجع له.

تم التعليق عليه منذ 5 شهور

بواسطة ياسر

Answer 14

حول فلوسك usdc واحفظها لين ربك يفرجها ويفتحون منصة مدعومه عندنا

Comments

انا شغلي مو في العملات اصلا شغلي كله نظامي وعندهم كل شيء حرفيا عن شغلي المهم رحت لهم اليوم وقلت اشوف وش السالفة في الاخير قالوا فيه أوراق لازم تعبيها المهم جابوا الاوراق عشان اعبيها هي نفسها بالضبببط الي عبيتها قبل اسبوعين !! استهبال الموضوع بس والي يقول غير بنك ثاني اولا اغلب الناس راجحي ادري ان فيه تحويل سريع ولكن فيه ناس رغم ذلك لو ماعند راجحي يسحب عليك وهذي الفئة مره مو قليل ولكن الحل الثاني اني افك لي حساب تجاري في بنك اخر ويكوت فيه اغلب راس المال لان الراجحي اسوء بنك مر علي في التاريخ ولكن الشكوى لله

تم التعليق عليه منذ 5 شهور

بواسطة محتار

Answer 15

فلوسك تنسحب وترجع لك غصب عنهم فلوسك ماتضيع بس حسابك يتقفل ويعطونك فلوسك الا في حال كان الفلوس الي في الحساب تتعلق بقضايا فساد وما الى ذلك ممكن تتجمد حتى تثبت من وين لك هذي الفلوس

Answer 16

الراجحي من الاخر اقولها لكم من الاخر

اذا ما عندك حساب بسجل تجاري انسا رح يجمدونه

البنوك الثانبة أخف شوي