زيت سيارة ثقيل أو خفيف أفضل ؟

Question

السلام عليكم ، برأيكم ماهو أفضل زيت لسيارتي ، ثقيل ولا خفيف ، وماهي الشركة التي تنصحني بها ؟

Answer 1

شوف يالغالي الكتالوج مكتوب في اللزوجه المناسبة لموترك
ايضا راح تحصلها على غطاء المكينه
اذا طلعت 5w30 مانصحك بزيت بيترومين
لاني جربته يطلع حنه في المكينه بعد ممشى 7000
وينقص بمقدار ربع علبة بعد ممشى 8000
انصحك بزيت كاسترول ماجناتيك
ممتاز للمكينه امشي علية 8500 لايطلع حنه ولا ينقص
علما اني مجربة سنتين ولا يلحقة كلام

Answer 2

بعض الناس من جيل الطيبين  اللي تعود على استخدام الزيت الثقيل
 ورافض يقتنع بفكرة انه في زيت افضل من الزيت الثقيل

Answer 3

انا كنت من مستخدمي زيت بترومين A-1 5/30 وبعد فترة زادت التكتكة معي ورحت للوكالة وقالي غير اللزوجة الى 10/30 وغيرتها والحمدلله ضبط واختفت التكتكة .... بخصوص الزيت الخفيف والثقيل هو يعتمد على نوع السيارة والموصى به ... اخر مرة استخدمت زيت بترومين 5/30 استخدام شاق وبر وامطار وشعبان وعلى ممشى 6500 غيرته وشكله يروع محترق بزود على ممشى السيارة 90 الف ...وعلى فكرة ايضا الفتر الاصلي له دور كبير خاصه مع التكتكة ويعانون منها سيارات البرادو والاف جي واللاند 6 سرندل... غير اللزوجة وركب فلتر اصلي وبأذن لله تختفي.

Answer 4

افضل زيت اغيره للاند كروزر 2013 ثمانية سلندر : في الصيف شل هيلكس 5w40 ........ وفي الشتاء شل هيلكس 5w30

Answer 5

كنت ابحث عن زيت لموتري وبعد قرأت الردود توصلت لقناعه ان يجب علي افتح كتلوج موتري واتقيد بما جاء فيه
شكرا لكم

Answer 6

نصيحه مجرب عبي 20W50 للجيب لان الخفيف بعد ١٠٠الف يطلع
 صوت التكايات المكينه وستخدم زيت الترا سفن كل ٤ الف غير الزيت

Answer 7

يقولك اذا تبي تستخدك زيت 10 دبليو 30 عادي

بس اذا جو بارد  استخدم زيت اخف

 واذا كان الجو عادي استخدم الزيت ذا 10 دبليو 30

 بس ماهو زين اذا كنت حق سرعه وكذى

اما 20 دبليو 50 مناسب جدآ للسرعات العالية وتحمل حرارة اجوائنا

يتحمل درجات حراراة تحت صفر 7 الين 40 وفوق

انا عن نفسي استخدم بترومين زيت 20 دبليو 50 على يارس 2008 اخذتها كرت والحين ماشاء الله ماشي عليها 300 الف وشوي والامور طيبه

Answer 8

مايحتاج ننصحك والكتلوج قدامك والصورة واضحه

دام الحراره ماتنزل عن 7 تحت الصفر استخدم 20w50
وهو اوفر واحسن زيت للمحافظه على المكينه في اجوائنا يعيبه فقط استهلاك البنزين زياده طفيفه ماتفرق عندنا لين يقولون سعر لتر البنزين 15 ريال

ربعنا هنا يحسبوننا بكندا ويشترون
5w30
ويزعل اذا مشى 3 الالف كيلو ومعيار الزيت ناقص

Answer 9

كنت أغير زيت السياره إلى الخفيف 30w10

وكان الديره عندنا بالصيف في حرارة

فكان يجي ناقص الزيت مع كل غيار لزيت السياره

حطيت 50w20 الثقيل

وهذا اللي أفضله

Answer 10

انا ماادري الي يقول زيت 30-5 او 30-10 ينقص وش وضعه
انا جربتها كلها وفي الصيف وخطوط الزيت ماينقص مثل ماهو
الافضل للسيارات الجديده 30-5 تخليقي كامل بس غالي
يمشى 10 الاف والي مايقدر عليه 30-10 ممتاز وسعره مناسب

Comments

اذا كل سياره بتسوقها تحط ذا الزيت

سلملي على المكينة لانها في اي لحضة بتودع معك

لان مكائن الشركات تختلف ليست كلها واحد

وكل مكينة لها نوع معين من الزيت تستخدمه

افضل زيت هو انك تفتح كتالوج سيارتك وتتبع تعليمات الشركة

تم التعليق عليه منذ 3 سنوات

بواسطة صالح

---

عندنا نيسان صني 12 و اكسنت 13 واكسنت 2008
وكلها نغير لها 30-10 صيف وشتاء ولا فيه اي مشاكل
السيارات القديمة هي الي ينفع لها 50-20

تم التعليق عليه منذ 3 سنوات

بواسطة ديم

Answer 11

استخدم كورولا من 6 سنين وما اغير لها الا هالزيت الترا 7 20-50 والجو عندنا ابرد من مكة لذلك انصحك استمر على هالزيت .
ان بغيت تغير اللزوجة للأخف استعمل بترومين 10-30

 
الزيوت تتغير على 5000 الآف لا تستعملها ل10 الاف + سعر الزيت في محلات الجملة ب10.50

Answer 12

افضل زيت لاجواء المملكه 50-20 ون بغيت اخف 30 -10

Comments

افضل زيت لاجوائنا وللمحرك هو 10w40 لانه 30 خفيف و50 ثقيل 40 متوسط مو ثقيل علي طرمبة الزيت وفي نفس الوقت يتحمل درجات حرارة عاليه نفس 50
واذا سيارتك حديثة حط زيت تويوتا التخليقي 5w40 العلبه الذهبية وامشي عليه 10000 وانت مرتاح عن تجربة

تم التعليق عليه منذ 3 سنوات

بواسطة نويصر

Answer 13

سيارة راف فور موديل 2001 اروبي ايش تنصحوا استخدم زيت لها

Comments

ما أدري بس اسأل الوكالة ، أو شوف كتالوج السيارة والزيت المناسب لها من حيث رقمه وكثافته

تم التعليق عليه منذ 1 سنة

بواسطة admin

Answer 14

الكتالوج يقول لك زيت 20/50
هذا اللي موصى فيه بمنطقة الخليج
اما زيت 5/30
هذا المناطق الباردة جدا اللي تجي برودة الجو فيها عشرة تحت الصفر
وماجبت شي من عندي هذا الكتلوج
وزيت يمشي عشرة الاف وينقص ويسود لونة مالك فيه
وباالتوفيق

Comments

اتشوش ع المسلمين وانت لاتفقه شي
20w50
طالع. من الخدمه في منتصف التسعينات ومواصفاته SL
خرجت من خدمه المحركات من عام 1998

تم التعليق عليه منذ 3 سنوات

بواسطة ناصر

Answer 15

الإخوان هنا مختلفين ، لكن نصيحتي لك ، شف كتالوج السيارة ، ثم شف رقم الزين ولزوجته ، وعبي مثله ، السيارات تختلف ، وكل سيارة لها مواصفات
ثم اختر الشركة اللي تناسب

Answer 16

انا استخدم 5w30 حسب الموصى به في الكاتالوج.